السلام عليكم وصبحكم ربي بالخير والنور والبركة

حلقة جديدة من قصة خونا سالم و الزواج نبدا ع بركة الله...

بعد موضوع خونا سالم مع اخت مدام صاحبه استمر خونا سالم في مشوار البحت عن الزوجة وشريكة الحياة وفي نفس الوقت يقرا والحمد لله ربي فتح عليه في القراية

بدي ياخد في الشهائد في مجال عمله تعرف ع بنت وصار في حديث ونقاش اكتر من مرة في مجالات عديدة وبدي فيه اعجاب من الطرفين وارتاحوا لبعض فاتح وانه مستعد يتقدم لعائلتها ويخطبها ويتزوجوا  البنت طلبت فترة تفكر فيه قاله سالم اكيد من حقك وبعد فترة صار لقاء بينهم بدوا في النقاش متع انتم شنو طلباتكم شنو اديروا.

بدت البنت تحكيله شنو دار وفي خواتها ( نسيت موضوع ع سالم ماقالت عليه ليكم سالم باني في حوش اماليه ) المهم بعد ماتمت البنت بدي سالم يحكي للبنت شنو عنده وشنو ماعندش ومرتبه وبرامجه .

مشي ردت عليه البنت انه موافقة ع الارتباط لكن في موضوع العيلة واحد قالتله مش راح ننزل لحوش بوك كل يوم ممكن مرة والا مرتين في الاسبوع بس.

طبعا صار فيه نقاش في الموضوع هدا بين سالم والبنت لانه سالم ولد واحد وهدا علاش بني فوق حوش اماليه .

كانت وجهة نظر سالم انه تنزل تعاون امه وتهدرز عليه وتنوسها قتنعت البنت بكلام سالم ومشي المرة هادي بوه وامه تعرفوا ع العيلة قبل وبعدين مشوا خواته وامه وهدرزوا مع العيلة وشنو طلباتهم كان رد ام البنت واخواته عادي ولي بتجيبوها مشي ام سالم فرحت وارتاحت لناس.

رجع عمك بو سالم لبو البنت وهدرزوا وساله ع طلباتهم باش يديروا الفضانية

مشي قاله بو البنت انه يبي يدرلها زي خواتها :

50 ليرة ذهب مؤخر - 4000 مقدم + اربع خرفان ( حاشاكم )- و ذهب مشي بو سالم قاله هو كيف يكمل في الحوش ولو قدر ع المقدم والخرفان مش راح يقدر ع الذهب . رد عليه بوالبنت قاله خلاص يتسجلوا عليه شرط في العقد . قاله بوسالم خلاص توا انشوف الولد وان شاء لله خير

رجع بو سالم لحوشهم وهدرز هو وام سالم ع لي صار مشي قالتله اممه وخواته ماقالوش هكي مشي قاللها هدا كلام بوها شوفي ولدك لو يقدر ع شروطهم باش انحدد مع بوه موعد ونمشوا انتم . امتى سمع سالم الطلبات انصدم واتصال بالبنت قالتله ايه عادية طلبات بوي زي خواتي لي قبلي

رد عليه سالم وقاللها ان شاء لله ربي يقوي سعدك ويرزقك بولد الحلال وراهو مافيش نصيب وكلم امه تكلم بوه باش يكلم بوالبنت ويقوله مافيش نصيب

تمت

غدوا نكملوا قصة خونا سالم لي معاش فيها هلبا باذن لله..